Yaşayış minimumu standartlarına yenidən baxılmalıdır” - ekspert

Ekspertlər bu göstəricinin real dəyərinin hesablanmasını təklif edirlər

Məlum olduğu kimi, martın 1-dən etibarən Azərbaycanda minimum əmək haqqı artırılaraq ölkə üzrə orta yaşayış minimumu həddinə çatdırılır. Prezidentin təşəbbüsü ilə atılan bu addımdan sonra Azərbaycanda yaşayış minimumunun hesablanması ilə bağlı müzakirələr başlayıb.

Xatırladaq ki, Azərbaycanda yaşayış minimumu Nazirlər Kabinetinin müəyyənləşdirdiyi normativlər əsasında hesablanır və hər il Milli Məclis tərəfindən təsdiqlənir. Bu il üçün təsdiqlənmiş yaşayış minimumu ölkə üzrə 180 manat, əmək qabiliyyətli əhali üçün 191 manat, pensiyaçılar üçün 149 manat, uşaqlar üçün 160 manat məbləğində müəyyən edilib.

İqtisadçı-ekspert Rövşən Ağayev deyir ki, hazırda müzakirələr bir məqama yönəlməlidir: “Azərbaycanda minimum yaşayış standartları nə dərəcədə ölkənin iqtisadi inkişaf səviyyəsinə uyğundur? Və minimum əmək haqqı minimum yaşayışın real hesablanmış standartlarına nə dərəcədə cavab verir? Nəzərə alaq ki, minimum yaşayış standartları az qala 15 il öncə təsdiqlənib. Halbuki o zamandan indiyə çox ciddi bir dəyişiklik baş verib: 2005-ci ildə Azərbaycan Dünya Bankının təsnifatında o zamankı gəlir standartı ilə adambaşına milli gəliri 3000 dollardan aşağı olan ”aşağı orta gəlirli" ölkələr qrupunda idi. Bu gün isə artıq adambaşına milli gəliri 5000 dollar ətrafında olan “yuxarı orta gəlirli” ölkələr qrupunda yer alıb.

Çox dərin və gözlə görünməyən məlumatlara ehtiyac yoxdur: 2005-ci ildə ölkədə dəyəri milyonla ölçülən villaya, dəyəri 70-80 min dolları ötən avtomobillərə sahib adamları barmaqla saymaq olardı, bu gün isə onların sayı-hesabı yoxdur. Yəni bu ölkənin zəngin 10 faizinin həyat standartları 10 dəfələrlə yüksəlibsə, yoxsul 10 faizinin yaşayış standartları nə qədər dəyişib? Bu sualın elə rəsmi cavabı çox şey deyir: 2005-2007-ci illərdə rəsmi yaşayış minimumu 65-70 dollar olub, 2019-cu ildə isə 105 dollardır. Ötən 12-13 ildə ABŞ-dakı inflyasiyanı da nəzərə alsaq, 1 ABŞ dollarının alıcılıq qabiliyyətinin də alıcılıq qabiliyyətində (real mübadilə dəyərində) baş verən azalmanı da nəzərə alsaq, belə çıxır ki, Azərbaycanda minimum yaşayış dəyərində ciddi artım baş verməyib. Halbuki məhz dolların dəyərsizləşməsini nəzərə alaraq, Dünya Bankı ötən dövrdə qlobal yoxsulluğun ölçülməsi üçün istifadə etdiyi “beynəlxalq dolların” alıcılıq qabiliyyətinə korreksiya edib. Məsələn, 2008-2014-cü illərdə Dünya Bankı yoxsulluğu ölçmək üçün adambaşına gündəlik qazancı minimum 1.25 dollar götürmüşdü - amma həmin məbləğ ABŞ dollarının 2005-ci ildə olan alıcılıq qabiliyyəti ilə hesablanırdı. 2015-ci ildə isə Dünya Bankı standartları dəyişdi - adambaşına gündəlik qazancı 1.90 dollara qaldırdı və bu dəfə isə həmin məbləğ ABŞ dollarının 2011-ci ildə olan alıcılıq qabiliyyəti ilə hesablanmağa başladı. Səbəb dediyimdir: həm dolların qlobal miqyasda dəyər itirməsi var, həm də minimum yaşayış standartları yüksəlməlidir".

R.Ağayevin dediyinə görə, bu yanaşmadan çıxış etməklə,  Azərbaycanda 2005-2007-ci illərdə 65-70 dolların alıcılıq qabiliyyəti ilə hazırkı 105 dolların alıcılıq qabiliyyətini də hesablamaq çox maraqlı olar: “Məsələn, mən sizə hamının bildiyi bir faktı deyim: 2005-ci ildə Azərbaycanda ətin qiyməti orta hesabla 4 manata yaxın idi - təxminən 5 dollar. İndi isə 12 manata yaxındır - haradasa 7 dollar.

Bu cür hesablamalar aparılsa, məlum olacaq ki, ölkə nəhəng gəlirlər əldə etsə də, iqtisadi imkanlar böyüsə də, aztəminatlı insanlar üçün hazırlanan rəsmi minimum yaşayış standartları demək olar ki, dəyişməyib".

Başqa bir müzakirə ediləsi məsələ kimi ekspert minimum istehlak səbətinin strukturunun dəyişməsini qeyd edir: “İndi Azərbaycanda 3 istehlak səbətində minimum istehlak üçün nəzərdə tutulan ərzaq, qeyri-ərzaq və xidmətlərin sayı 150 çeşid ətrafındadır. Halbuki inkişaf etmiş ölkələrdə həmin göstərici 300-350 ətrafındadır. Yeri gəlmişkən, bu məsələdə çox ciddi qeyri-şəffaflıq var. Nazirlər Kabinetinin istehlak səbətinin strukturu ilə bağlı qərarında mal qruplarının əmtəə sturkturu açılanmır. Məsələn, ”meyvə və giləmeyvə" üzrə illik istehlak bir nəfər üçün 38 kq müəyyən edilib. Amma konkret meyvə və giləmeyvə növlərinin adı və norması ilə bağlı qərarın əlavəsi ictimaiyyətdən gizli saxlanır.

Başqa bir problem qida normalarının səviyyəsi ilə bağlıdır. Məsələn, bir nəfər üçün ət və ət istehlakı qonşu Rusiyada 58.6 kq, Azərbaycanda 32.9 kq, meyvə və giləmeyvə istehlakı Rusiyada 60 kq, Azərbaycanda 38 kq, balıq və balıq məhsulları Rusiyada 18.5 kq, Azərbaycanda 7.7 kq minimum norma kimi təsdiqlənib. Bu normalara yenidən baxılması çox vacibdir. Başqa bir vacib məqam: yaşayış minimumu haqda qanuna görə, ölkə üzrə yaşayış minimumunun 4 göstəricisi təsdiqlənir: ölkə üzrə orta göstərici - hazırda 180 manatdır, əmək qabiliyyətli əhali üçün (hazırda 191 manat), pensiyaçılar üçün (hazırda 149 manat), uşaqlar üçün (hazırda 160 manat). Halbuki Nazirlər Kabinetinin qərarında orta normalar yoxdur, yalnız 3 demoqrafik qrup üzrə səbətlər müəyyən edilib. Əgər orta normalar yoxdursa, o zaman yaşayış minimumunun orta dəyəri necə hesablanır"?

R.Ağayev hesab edir ki, yaşayış minimumunun dəyəri ilə yanaşı ərzaq səbəti ayrıca olaraq təsdiqlənməli, ölkədə ərzaq yoxsulluğu ilə bağlı göstərici ayrıca olaraq bəyan edilməlidir: “Fərd və ailə üçün yaşayış minimumunun da ayrıca təsdqilənməsi çox vacibdir”.

İqtisadçı-ekspert Natiq Cəfərli də hesab edir ki, mövcud göstəricilər ölkə üzrə minimum yaşayış səviyyəsini dəqiq əks etdirmir: “Azərbaycanda yaşayış minimumunun hesablanması üçün istifadə olunan indiqatorlar çox köhnəlib. Onlara yenidən baxmağa ciddi ehtiyac var. Burada söhbət həm ərzaq rasionundan gedir, həm kalori baxımından, geyim normaları və sairdən gedir. Minimum istehlak səbətinə bir sıra xidmətlərin də xərcləri əlavə olunmalıdır. Məsələn, internet xərcləri, dincəlmək, əyləncə xərcləridir, fərdi təhsillə  bağlı xərclərdir. Bunlar da səbətə daxil edilməli, yeni parametrlər müəyyənləşdirilməlidir. Təsəvvür edin ki, geyim xərclərini hesablayarkən 3 ilə bir cüt ayaqqabı, 5 ilə bir dəst üst geyimi hesablanır. Bunlar üst geyimlərinə aid 1986-cı ildə SSRİ Nazirlər Komitəsinin verdiyi normativlərdir. Buna görə də yaşayış minimumu ilə bağlı ciddi araşdırmaların aparılmasına və dəyişikliklərin edilməsinə ehtiyac var”.

N.Cəfərlinin sözlərinə görə, bu sahədə Avropa, yaxud elə qonşu Gürcüstan, Rusiyanın təcrübəsi öyrənilməlidir: “Hətta Rusiyada yaşayış minimumunun hesablanma mexanizmində ciddi dəyişikliklər edilib. Avropa Birliyinin ən kasıb ölkəsi olan Bolqarıstanda yaşayış minimumu 195 avrodur. Azərbaycan manatı ilə götürdükdə 400 manata yaxın edir. Özü də Bolqarıstanda qiymətlər Azərbaycandan ucuzdur. Yaxud Türkiyədə 4 nəfərlik bir ailə üçün yaşayış minimumu 5 min lirəyə yaxındır. Azərbaycan manatına çevirdikdə 4 nəfərlik ailənin yaşayış minimumu 1600-1700 manat edir. Buna görə də hesab edirəm ki, Azərbaycanda da bu məsələyə yenidən baxılmalı, yaşayış minimumu müasir normativlərlə hesablanmalıdır. Bununla bağlı Milli Məclis qanun da qəbul edə bilər. Bu hesablamalar aparıldıqdan sonra  dəqiq söyləmək olar ki, Azərbaycanda yaşayış minimumu, ona uyğun olaraq minimum əmək haqqı, minimum pensiya nə qədər olmalıdır ki, bir nəfərin aylıq zəruri xərclərini tam qarşılasın”.

Dünya SAKİT,
“Yeni Müsavat”