Rusiyanın Dəniz piyadaları və Baltik Donanmasının xüsusi təyinatlıları Kalininqrad vilayətindəki poliqonda təlimlərə başlayıblar. Desant qüvvələri şərti düşmənin rabitə vasitələrini sıradan çıxarmaq vərdişlərini artırmaq üçün məşqlərə başlayıblar. Bu barədə iyunun 24-də "İnterfaks" məlumat yayıb.
Donanmanın Mətbuat Xidmətindən verilən məlumata görə, yaxın 7 gün ərzində hərbi qulluqçular hərbi dəniz aviasiyasının Mi-8 nəqliyyat və döyüş helikopterlərindən tam döyüş texnikasında 150-yə yaxın tullanış edəcək, bundan sonra “yerdə” tapşırıqları yerinə yetirəcəklər. Bildirilir ki, təlimlərə əsir götürmə vərdişlərinin təkmilləşdirilməsi, kəşfiyyat patrullarının həbs edilməsi, şərti düşmən rabitəsini sıradan çıxarmaq yolları, QLONASS sisteminin istifadəsi, həmçinin yeni qısa mənzilli kəşfiyyat stansiyaları və portativ yerüstü kəşfiyyat avadanlıqlarından istifadə daxildir.
Bundan əvvəl bildirilmişdi ki, Baltik Donanmasının gəmiləri donanmanın dəniz poliqonlarında atəş təlimləri keçiblər. Ekipajlar artilleriya qurğularının və zenit-raket komplekslərinin (SAM) atəşi ilə saxta düşmənin qanadlı raketlərini vurublar. Təlimlərə “Yaroslav the Wise” patrul gəmisi, həmçinin “Stoykiy” və “Soobrazitelnıy” korvetləri cəlb olunub.
Qeyd edək ki, son günlər Litvanın Kalininqrada tranziti dayandırması ilə bağlı verdiyi qərar Rusiyanın sərt reaksiyasına səbəb olub. Rəsmi Vilnüsün Kalininqrad vilayəti ərazisinə və əks istiqamətə sanksiyalara aid olan yüklərin tranzitinə məhdudiyyətlər qoyması Rusiya ilə Litva arasında müharibə təhlükəsi yaradıb. Bunu artıq Rusiya rəsmiləri açıq şəkildə dilə gətirir və "müharibə səbəbi" adlandırılar.Vilnüsün qərarından sonra Rusiya Xarici İşlər Nazirliyi Litvadan Kalininqrad vilayətinə yüklərin tranzitinə qadağanın ləğvini tələb edib. Bununla əlaqədar Litvanın Moskvadakı müvəqqəti işlər müvəkkili Virginiya Umbrasene Rusiya XİN-ə dəvət olunub. XİN Litvanın tranziti bağlamasını “açıq düşmənçilik” və beynəlxalq hüquqi öhdəliklərin pozulması hesab etdiyini bildirib.
Rusiya XİN-in mətbuat katibi Mariya Zaxarova isə açıqlamasında Vilnüsün bu addımını "müharibə səbəbi" adlandırıb. Rəsmi Moskva bildirir ki, əgər tranzit bərpa olunmasa, Rusiya öz milli maraqlarının müdafiəsi üçün suveren hüququndan istifadə edəcək. Bu, Rusiya qoşunlarının Ukraynadan sonra Litvaya yeridilməsi ehtimalını artırır. Bir sıra ekspertlər hesab edir ki, Moskvanın bəyanatları təhlükəli vəziyyətdən xəbər verir. Analitiklər hesab edirlər ki, Litva NATO ölkəsidir və Rusiyanın bu addımı Litvaya qarşı deyil, NATO-ya müharibə elan etmək olardı.
"Avropa Birliyi və NATO İkinci Dünya müharibəsi zamanı Hitlerin etdiyi kimi, Rusiya ilə müharibə üçün koalisiya qurur". Bunu isə Rusiyanın XİN rəhbəri Sergey Lavrov Bakıda səfəri zamanı deyib. Onun sözlərinə görə, Avropa Birliyinin indiki rusofob ittihamının hansısa şəkildə dağılacağına və ya dəyişəcəyinə dair heç bir illüziyaları yoxdur: "Lakin bu, avropalıların seçdiyi yoldur. İkinci Dünya müharibəsi başlayanda Hitler SSRİ-yə qarşı müharibəyə Avropa ölkələrinin çoxu olmasa da, əhəmiyyətli bir hissəsini öz bayrağı altında topladı. İndi Avropa Birliyi NATO ilə birlikdə Rusiya ilə döyüşmək və bütövlükdə müharibə aparmaq üçün müasir koalisiya toplayır”.
Qeyd edək ki, bu günlərdə nüfuzlu “Politico” nəşri də Rusiya-NATO müharibəsinin real olduğu haqqında yazmışdı. Məqalədə bildirilirdi ki, Suvalski dəhlizi hipotetik olaraq ən təhlükəli ərazidir. Məhz o, NATO ilə müharibə təqdirində Rusiya hakimiyyətinin ilk hədəfinə çevrilə bilər.“Litvanın cənub-şərq sərhəddində yerləşən Druskininkay şəhəri “Suvalki boşluğu” kimi tanınan dar bir strateji əraziyə baxır. Qərb hərbi planlaşdırıcıları xəbərdarlıq edirlər ki, Rusiya Prezidenti nə vaxtsa Ukraynaya qarşı müharibəni NATO ilə birbaşa toqquşmaya çevirmək istəsə, bu ərazi onun ilk hədəflərindən biri olacaq”, – məqalədə vurğulanıb.
Xarici ekspertlərə görə, Moskva Kalininqrada quru dəhlizi yaratmağa cəhd edə bilər ki, bu, nüvə silahından istifadə etməklə Avropa dövlətləri arasında genişmiqyaslı müharibəyə təkan verə bilər.
Beləliklə, yerli və xarici ekspertlərin qənaəti o fikri formalaşdırır ki, Kalininqrada tranzitin dayandırılması Baltikyanı bölgədə gərginliyi artıra, Rusiya-NATO müharibəsini başlada bilər. Rusiyanın Baltik Donanmasının bir həftəlik təlimləri də ehtimalları gücləndirir.
