SOCAR prezideni ilə Sərgən Yalçın arasındakı danışıqları kim pozub? - TÜRKİYƏDƏN GƏLƏN QƏFİL ZƏNGİN DETALLARI

SOCAR prezideni ilə Sərgən Yalçın arasındakı danışıqları kim pozub?
Türkiyənin tanınmış məşqçilərindən biri olan Sərgən Yalçının Bakıya gəldiyi və "Neftçi" ilə danışıqlar apardığı barədə məlumat vermişdik. Tərəflərin qısa zamanda danışıqlarda irəliləyiş əldə etməsi və "ağ-qaralar"ın Laurentsiu Regekampla yollarını ayırması ictimaiyyət tərəfindən maraqla izlənilirdi. Hətta 50 yaşlı mütəxəssislə müqavilə bağlanacağı, dünən axşam və ya bu gün ərzində paytaxt təmsilçisi tərəfindən bu barədə açıqlama veriləcəyi gözlənilirdi. Sən saydığını say, gör Sərgən nə sayır...

Yalçınla danışıqlar iyunun 20-də Bakıya gəldiyi tarixdə başlamışdı. "Neftçi" adına onunla müzakirələri klubun Müşahidə Şurasının sədri və baş sponsoru olan SOCAR-ın prezidenti Rövşən Nəcəf şəxsən aparırdı. İlk gündə gecə saatlarına qədər davam edən danışıqlarda bir çox məsələlərə aydınlıq gəlmişdi. Bəzi anlaşılmaz qalan məsələlər var idi ki, bunun üçün səhərisi günə, iyunun 21-ə görüş təyin edilmişdi.

DİA.AZ bildirir ki, Publika.az-ın əldə etdiyi məlumata görə, nə baş veribsə, elə 21-i səhər saatlarında baş verib. Adı "Neftçi" ilə hallandıqdan sonra telefonlara cavab verməyən, zəngləri və mesajları əngəlləyən Sərgən Yalçın İstanbuldan gələn bir zəngi cavablamaq qərarına gəlib. Bu telefon danışığından sonra 50 yaşlı məşqçi "ağ-qaralar"la başqa üslubda, tamam başqa şərtlərlə danışıb. Hətta ilk gündəki razılaşmaların üstündən xətt çəkib. İlk gündə 1 milyon dollarlıq maaşa razı olan Sərgən zəngdən sonra bakılılardan 2 dəfə çox pul istəyib. Onun əlavə istəkləri də olub. Hətta bəzi türkiyəli futbolçuların da xidmətini təklif edib ki, bu da Rövşən Nəcəfi razı salmayıb. Beləcə, tərəflər arasında danışıqlar uğursuzluqla nəticələnib. R.Nəcəf türkiyəli məşqçiyə son təklifini etdikdən sonra görüş başa çatıb. Bundan sonra Sərgən və komandası xüsusi təyyarə ilə İstanbula qayıdıb.

İndi isə qayıdaq "Neftçi" ilə Sərgən Yalçın arasındakı danışıqları pozan zəngə... 50 yaşlı çalışdırıcıyla əlaqə quran şəxs "Fənərbağça"nın idarə heyətinin üzvü Ahmet Ketenci olub. İstanbul təmsilçisinin prezidenti Ali Koçun istəyi əsasında mütəxəssislə əlaqə quran Ketenci onunla görüşmək istədiklərini, "Neftçi" nə təklif edirsə, o şərtləri qarşılamağa hazır olduqlarını deyib. İsrarla Yalçından Türkiyəyə dönməyini istəyib. Bu fürsəti əldən vermək istəməyən Sərgən "ağ-qaralar"la danışıqların pozulması üçün əlindən gələni edib.

O, "Neftçi"nin Müşahidə Şurasının sədri Rövşən Nəcəfdən 2 gün vaxt istəsə də, bu, sadəcə formal istəkdir. Çünki onun istəkləri və davranışı Bakıda müsbət qarşılanmayıb. Türkiyəli məşqçiyə dəvəti qəbul etdiyinə və müzakirələrdə iştirak etdiyinə görə təşəkkür edilib. Onun köməkçisi Murat Şahinin təyyarədən etdiyi "Instagram" paylaşımı da elə bunun göstəricisidir:

"Neftçi" klubu və SOCAR prezidenti Rövşən Nəcəfə bizə göstərdikləri qayğıya görə çox təşəkkür edirik".

Bizdə olan məlumata görə, Sərgən Yalçın bu gün əvvəlcə Ahmet Ketenci, daha sonra Ali Koçla görüşəcək. Ketencinin danışıqlarda iştirak etməsi onun "Fənərbağça"nın baş məşqçisi olma şanslarını xeyli artırır.
Tarix: 22-06-2023, 10:39
Xəbəri paylaş



Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

{sape_links}{sape_article}