İlyarımdır qapıları vətəndaşların üzünə bağlı ola-ola

İcra hakimiyyətinin saytı başçıya mədhiyyə yağdırmaqla məşğuldur

Bu günlərdə Onlayn İctimai Nəzarət Platforması və ABŞ Beynəlxalq İnkişaf Agentliyi (USAID) iyun ayında istifadəyə verilən E-Nəzarət Platformasının (www.enezaret.az) rüblük ilkin nəticələrini açıqlayıb. Rübün nəticələrinə əsasən, vətəndaşların müraciətlərinə baxılması baxımından fəal olduğu müəyyən edilən 13 dövlət qurumu seçilib. Onların arasında Mingəçevir şəhər İcra Hakimiyyətinin adı da yer alıb. Bu münasibətlə Mingəçevir şəhər İcra Hakimiyyəti xüsusi diplomla təltif edilib və icra başçısı İlham İsmayılova mükafat-plaket təqdim olunub.
Qeyd edək ki, Açıq Hökumət Milli Platforması ilə əməkdaşlıq çərçivəsində baş tutan pilot layihənin məqsədi ictimaiyyəti narahat edən müəyyən məsələlərə dair (yol, infrastruktur, abadlıq və s.) vətəndaşlardan video və foto sübutu olan məlumatı qəbul etmək və müvafiq dövlət orqanlarında onların həllinə nail olmaqdır.
Öncə qeyd olunan www.enezaret.az saytı barədə. Saytda Mingəçevirlə bağlı cəmi 2 müraciət yer alıb: biri məişət tullantılarının daşınması, digəri də nasaz vəziyyətdə olan kəmərdən su sızmasıyla bağlıdır. Belə məlum olur ki, hər iki halda vətəndaş(lar) Platformaya, onlar da öz növbəsində Mingəçevir şəhər İcra Hakimiyyətinə müraciət edib(lər) və beləcə, problem öz həllini tapıb. Vəssalam! İcra hakimiyyəti də “ən fəal dövlət orqanı” kimi mükafata layiq görülüb.
Əslində isə bu, sol əllə sağ qulağı qaşımaqdır. Nəyə görə vətəndaş həyətinin qarşısında yığılıb qalmış zibilin daşınması və yaxud nasaz su kəmərinə görə hansısa www.enezaret.az saytına müraciət etməlidir? Oradan da həmin müraciət vətəndaşın qulağının dibində olan və buna görə məsuliyyət daşıyan müvafiq icra hakimiyyətinə ünvanlanmalıdır? Bu nə məntiqdir?
Biz E-Nəzarət Platformasının qalib(lər)i başqa hansı kriteriyalara görə müəyyən edib seçdiyini deyə bilmərik. Bildiyimiz odur ki, konkret Mingəçevir şəhər İcra Hakimiyyəti 1 il 6 aydan çoxdur ki, qapılarını məlum səbəblərdən vətəndaşların üzünə bağlayıb. Belədə hansı operativlikdən və vətəndaş müraciətlərinə baxılmasında fəallıqdan söhbət gedə bilər?
Görünür, layihənin təşkilatçıları icra hakimiyyətlərinin, konkret olaraq mükafatlandırdıqları Mingəçevir şəhər İH-nin veb-saytının formal xarakter daşıdığından xəbərsizdirlər. Çünki hazırki dövrdə vətəndaşların müraciətini virtual olaraq canlı şəkildə cavablandırmalı olan aparatın saytını icra başçısının hara gedib-gəldiyi, az qala nə yeyib-içdiyi barədə yazılar bəzəyir.
Ümumiyyətlə, ölkədə yerli icra hakimiyyətlərinin saytlarıyla bağlı durum olduqca acınacaqlıdır. Bütün şəhər və rayonların icra hakimiyyətlərinin veb-resursları bir-birinin təkrarıdır, hamısı sanki inkubatordan çıxıb. Standart xəbərlər, standart şəkillər, icra başçısına həsr olunmuş mədhiyyələr. Bir sözlə, bu gün yerli icra hakimiyyəti orqanlarının əksəriyyətinin saytları olsa da, onların içərisində vətəndaşın, ölkəyə gələn potensial turistin öyrənəcəyi, faydalana biləcəyi heç nə yoxdur.
Qayıdaq Mingəçevir şəhər İcra Hakimiyyətinin xüsusi diplompa təltif edilməsinə. Bu mükafatlandırma bizə bir vaxtlar icra başçılarının dəbdə olan mükafatlandırılması prosesini xatırlatdı. Son bir neçə il öncəyədək hökumətə məxsus QHT-lər – beynəlxalq terminlə desək, “qonqolar” cürbəcür mükafatlar, diplomlar təsis edir, bu mükafatları bir qayda olaraq hansısa deputata, icra başçısına, bələdiyyə sədrinə və s. təqdim edirdilər (deyəsən, “ənənə” yenidən bərpa edilir).
Ancaq bu “diplomlar” heç də hər məmura uğur gətirmirdi. Məsələn, 5 il öncə Azərbaycan-Slavyan Gəncləri Assosiasiyası “İLİN BAŞÇISI” adlı bir sorğu keçirmişdi və sorğunun qalibi Biləsuvar rayon İcra Hakimiyyətinin başçısı Mahir Quliyev olmuşdu. O M.Quliyev ki, həmin mükafata layiq görüldükdən bir müddət sonra Dövlət Təhlükəsizlik Xidmətinin keçirdiyi əməliyyat-istintaq tədbirləri nəticəsində saxlanılmış və məhkəmənin qərarı ilə barəsində həbs qətimkan tədbiri seçilmişdi. Cinayət Məcəlləsinin 179 (mənimsəmə və israf etmə), 308.1 (vəzifə səlahiyyətlərindən sui-istifadə etmə), 311.3.2 (təkrar rüşvət alma) və 313-cü (vəzifə saxtakarlığı) maddələri ilə ittiham olunan M.Quliyevlə bağlı istintaq indiyədək davam edir.
Yeri gəlmişkən, sabiq icra başçısının “qalib” olduğu sorğunu təşkil edən Azərbaycan-Slavyan Gəncləri Assosiasiyasının sədri Səbuhi Abbasov 2020-ci ildə Mingəçevirdən Milli Məclis üzvlüyünə namizədliyini irəli sürmüşdü.
Odur ki, Mingəçevir şəhər İcra Hakimiyyəti də daxil, Onlayn İctimai Nəzarət Platformasının mükafatına layiq görülən digər qurumların rəhbərləri çox da sevincək olmasınlar. Mükafatın da düşər-düşməzi olur.

---

---