Bu barədə "Azad İran" telegram kanalı məlumat yayıb.
Məlumatda qeyd olunur ki, silahlı şəxslər Çabəhar şəhərində 12 saylı polis bölməsi də daxil olmaqla iki hərbi qərargaha hücum ediblər.
Silahlı hücumun İran hökumətinə müxalif "Ceyş-əl-Ədl" və "Ceyş-əzzülm" qruplaşmaları tərəfindən həyata keçirildiyi bildirilir.
Sistan və Bəlucistan vilayətinin Çabahar və Rask şəhərlərində törədilən terror aktlarında 5 terrorçu zərərsizləşdirilib, 5 təhlükəsizlik qüvvəsinin əməkdaşı isə həlak olub. Ölənlər arasında Çabahar şəhərinin polis bölməsinin rəis müavini də var.
Görəsən, İranda nə baş verir?
Mövzu ilə bağlı Bizim.Media-ya açıqlamasında politoloq Tofiq Abbasov bildirir ki, Dəməşqdəki İran konsulluğuna edilən zərbədən sonra bu ölkədəki bir sıra polis və hərbi bölmələrə hücumların başlaması İsrailin özünəxas qabaqlayıcı addımlar atdığının göstəricisidir:
“Hələ ki, İrandan belə məlumatlar gəlməyib. Amerika, Avropa, eləcə də İsrailin rəsmi dairələrinə yaxın etibarlı mənbələr qarşıdakı 48 saat ərzində Tehranla Təl-Əviv arasında müharibənin başlayacağını bildirirlər. Söhbət ondan gedir ki, İran dronlar, uçan aparatlar, raketlər vasitəsilə İsrailə hücum edəcək. Bu müstəvidə İrandakı bir sıra polis və hərbi bölmələrə hücumlar başlayıbsa, o deməkdir ki, İsrail özünə xas olan qabaqlayıcı addım atır.
İsrailin İranda güclü agentura şəbəkəsi mövcuddur.
İsrailin buradakı mənbələri iranlı alimləri öldürür, yerli əhalini ələ alırlar. Yəni özünə məxsus təbliğat-təşviqat, həm də pozucu işlərlə məşğuldurlar. İranda yaşanan bu qarşıdurma onu göstərir ki, İsrail düşməni qabaqlamaq üçün yenə də əvvəllər istifadə etdiyi taktikadan yararlanmaq istəyir. 1967 və 1973-cü illərdə də anoloji proseslər baş verib. Həmin dövrdə İsrail ərəblərin hücumunu gözləmədən özü hücuma atıldı və onları yaxaladı”.
Amma həmsöhbətimiz İranla bağlı bu prosesin gerçəkləşə biləcəyini düşünmür:
“Çünki İran ərəb ölkəsi deyil və onun güclü potensialı var. İran mövcud durumda cavab vermək lazım olduğu qərarına gəlsə, İsrailin vəziyyəti çox ağır olacaq. Nəhayət İsrail ətrafındakı ərəb ölkələri də İsraiilə köhnə haqq-hesablarını çürütməyə başlayacaqlar”.
