“Qarabağ məsələsi bitməyib” deyənlər... - Əks təzyiqlər göstərməkdən çəkinməməliyik

“Qarabağ məsələsi bitməyib” deyənlər...
Hər gün olmasa da, erməni mediasını oxuyanda müxtəlif siyasi şərhçilərdən, eləcə də Paşinyan hakimiyyətinə müxalif olan siyasi qüvvələr tərəfindən “Qarabağ məsələsi hələ bitməyib” fikrinin səsləndirildiyini görmək olar. Xüsusilə, keçmiş XİN naziri Oskanyan və onun tərəfdaşları, separatçı rejimin keçmiş məmurları, xaricdəki daşnaklar bunun üçün konkret fəaliyyət istiqamətləri də göstərirlər. Qarabağa qayıtmaq üçün Qarabağ erməniləri arasında “petisiya” keçirildiyi və nəticələrini beynəlxalq mərkəzlərə göndərib qayıdanlar üçün “status” və təhlükəsizlik təminatları alacaqları uğrunda fəaliyyətə başladıqları barədə məlumatlar yayılıb. Diaspora da həmişəki kimi öz ampluasında. Dünən Amerika Erməni komitəsi -ANCA-nın nümayəndələri ilə Artak Beqlaryan və guya hələ də “artsaxın ombudsmanı” olan birisi arasında ermənilərin təminatlı olaraq Qarabağa dönməsi haqqında müzakirələr aparıldığı barədə də məlumatlar yayıldı. Daşnaklar Rusiya sülhməramlılarının Qarabağda qalmasını isə fürsət kimi dəyərləndirir, Rusiyanı perspektiv təminatçı rolunda görürlər. Bu gün də “Ana Ermənistan” hərəkatının lideri Andranik Tevanyan “Qarabağ mövzusunun qapanmadığını, Qarabağ ermənilərinin pozulmuş hüquqlarının beynəlxalq platformalarda gündəmə gətirilməsini, təhlükəsizlik təminatları və müəyyən status müqabilində Qarabağ sakinlərinin geri qayıtması imkanlarının nəzərdən keçirilməsini” mediada paylaşıb.

“Boş şeydir”-deyib, üstündən keçə bilərik, amma dünyanın çox qarışıq olduğu, dünya düzəninin dağıldığı, bizi istəməyən, hələ də təzyiq göstərən qüvvələrin içərisində qlobal güclərin də olduğunu nəzərə alıb işimizi sağlama bağlamalıyıq. Fikirləşməyək ki, Qarabağı tərk edən ermənilər bir də qayıtmazlar. Erməni heç vaxt problemini özü həll etməyib, başqasının əli ilə görməyə çalışıb. Əlbəttə, özbaşlarına qalsa, gələn olmayacaq, amma yenə onlardan alət kimi istifadə edib, regionda təsir imkanlarını artırmaq istəyənlər bu qarışıq zamanda ermənilərin qolundan tutub gətirməyə cəhdlər edəcəklər. Ermənilər Birinci Qarabağ müharibəsindən sonra işğal olunan rayonlarda kimləri məskunlaşdırdılar? Livandan, Suriyadan, Fransadan gətirdikləri erməniləri və Ermənistanın özündə yaşayan evsizləri Laçın, Kəlbəcər, Qubadlı, Zəngilanda yerləşdirdilər.

Diplomatik addımlarımız, mübarizəmiz öz yerində, başda Xankəndi olmaqla Qarabağ iqtisadi zonasında məskunlaşma prosesinə start verməliyik. Vaxtilə etnik təmizləməyə məruz qalmış Xankəndi sakinlərinin və Xankəndi ətrafındakı Kərkicahanlıların yurdlarına dönməsi və bunun üçün zəruri bilinən şərtlərin həyata keçirilməsi bizim təxirəsalınmaz işimiz olmalıdır. Dünyanın təhlükəli bir dönəm yaşadığını biz də fürsət kimi dəyərləndirib, maraqlarımızı ləngimədən reallaşdırmalıyıq.

Ermənilər və havadarlarının Azərbaycana olan təzyiqləri bir tərəfdən sülhün imzalanmasını süni şəkildə uzatmaqdırsa, digər tərəfdən Azərbaycanı Zəngəzur yolu, anklav kəndlər, hətta Qarabağ ermənilərinin geri dönməsində hansısa güzəştlərə məcbur etmək siyasətidir. Odur ki, biz əks təzyiqlər göstərməkdən çəkinməməliyik. Bizim təzyiqlərimiz beynəlxalq hüquqa əsaslandığı üçün bizə cavab olacaq iradların əsası olmayacaq. Məsələn, Delimitasiya komissiyasının bu günkü görüşünün nəticələri haqqında heç nə bilməsək də, Qazaxın anklav olmayan 4 kəndinin ilk mərhələdə Azərbaycana qaytarılması bizim qanuni təzyiq vasitəmiz olmalıdır. Bu, bir daha “Qarabağ məsələsi Azərbaycan üçün bitib” fikrinin təsdiqi olacaq. Amma, ən öndə atacağımız addım Xankəndinin məskunlaşdırılmasıdır. O cümlədən, böyük ərazisi olan Ağdərədə də azərbaycanlıların doğma yurdlarına qayıtması üçün işlərə başlamaq, “Qarabağ məsələsi bitməyib” deyənlərin xəyallarının birdəfəlik gömülməsi olacaq.

Avropa İttifaqına daxil olan ölkələrdə Ermənistan respublikasının diplomatik nümayəndəliklərinə xüsusi tapşırıq verilib ki, qısa müddət ərzində səfirlər həmin ölkələrin parlament rəhbərləri ilə görüşüb Qarabağ ermənilərinin geri dönməsi üçün Azərbaycana çağırışlar edilməsi barədə müzakirələr aparılsın. Artıq bu prosesə başlanılıb. Aydındır ki, Azərbaycan kimin nə çağırış etməsindən asılı olmayaraq öz maraqlarına uyğun olan siyasətini aparacaq. Sadəcə olaraq, beynəlxalq ictimaiyyətdə imicimizə zərər gələ biləcək fikirlərin formalaşmaması üçün preventiv diplomatik addımların atılması erməni revanşistlərinə, diaporasına, kilsəsinə zərbə olmaqla yanaşı, havadarlarına da tutarlı cavab olmuş olar ki, bir daha erməni tələsinə düşməsinlər.
Moderator.az
Tarix: 1-02-2024, 09:54
Xəbəri paylaş



Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

{sape_links}{sape_article}